طباعة النقود

ليه ما ينفعش أي دولة تطبع فلوس كتيرة؟ 

لحد سنة 1931 كانت الدول بتربط قيمة عملتها بالدهب ... يعني كان لازم تشتري دهب، كأن ورقة البنك نوت دي وصل أمانه بيثبت ملكيتك في البنك لدهب.. 
وبالتالي مكانش ينفع أن يبقى معاك فلوس غير لما يكون عندك دهب والورق ده-الفلوس يعني- بيثبت ملكيتك لكمية الدهب المعلومة.

الموضوع ده عمل ثبات في سعر العملات، يعني مثلاً
20 دولار=4.25 استرليني = 110 وحدة دهب
والحدود العليا والدنيا للأسعار هي الفرق بين سعر بيع وشرا العملات.
عشان ما ندخلش في تفاصيل وكلام كتير.. 

بعد الكساد الكبير سنة 31 عملوا حاجة اسمها قاعدة المعدنين "الدهب والفضة" بدل "قاعدة الدهب".
وبعدين سنة 72\73 العملات ما بقتش مرتبطة بمعادن خالص واكتسبت قوتها من القانون، وممكن تدوروا في جوجل على قاعدة الدهب والنقد معاً.

المهم أن الدولة لو فضلت تطبع فلوس منغير زيادة حقيقية في الإنتاج هتعمل زي الي بيعمل عصير فرولة وعمال يزود مية منغير ما يزود فراولة أو سكر . وبتالي بيخلي العصير ماسخ وزي قلّته.

والفلوس زيها زي أي سلعة "مرنة" بتتأثر بالعرض والطلب، تخيل لو عندنا 10 سلع واحنا عشرة وكل واحد معاه 10 جنيه وتمن كل سلعه 10 جنيه كل واحد هيقدر يتشري سلعه بـ 10 جنيه. 

لو طبعنا 100 جنيه تانيه بقى كل واحد معاه 20 كده هيقدر يشتري سلعتين يعني كلنا نشتري 20 سلعه وفي السوق مفيش غير 10 بس يقوم سعر السلعه يعلى عشان الطلب عليها زاد ويبقى 20 جنيه.

أي طباعه في النقود بدون زياده حقيقيه في الإنتاج هتؤدي للتضخم اللي هو زياده في المستوى العام للأسعار.

والدول الكبيرة هتتخنق منك وتضايقك..
أي حد متابع لخناقات الدول الكبيرة هيلاقي ان امريكا بتحاول تخلي عملة الصين قيمتها أعلى من القيمة الحالية!
شفت ازاي؟ عايزة عملة دولة تانية تبقى غالية. 

لأن الصين مثلاً سعر عملتها صوغيرة بالنسبة للعملات التانية ولقيمتها الحقيقية.
فلما سلعهم بتتصدر برّة بتبقى ارخص من السلع المحلية، وده فاحت امريكا ومعكنن عليها.

محمدالهلاوى

محلل مالى مضارب تقنى

شاركه على جوجل بلس